《南京》（午言）

山围故国周遭在

潮打空城寂寞回

淮水东边旧时月

夜深还过女墙来

上海格石库门，勿单单是三块石条搭只门框噢，老上海人讲起石库门房子：一上一下起码货，二上二下一般货，三上三下稀奇货，我住了纯德里，三条弄堂里只有阿拉一家格房子是三上三下，后门就两大扇，走进来就是一只大天井，楼梯两转弯，第一层十格，呒么亭子间格，再转上去十一格，前头天井五十多平方，前弄堂隔断变工场间，多少趟运动也呒么拿伊打通，住了里厢格人有眼居高临下，二房东施仪屛勒了旧社会开了一爿“施鸿记”，专做红木家什出租生意，旧上海滩浪厢上档次格舞厅、四马路妓院里格红木家具侪是施家格，杜月笙拿法租界薛华立路一套洋房送拨杨度，里厢格家什侪是租来格。

今朝接龙讲昨日来勿及讲格事体 。搭我住了一条弄堂里格小兄弟，南京上海人达世钧，从小就日日混勒了一道，回族、勿忌口、伊样样侪吃，后来从比乐中学一直做到向明中学格英文老师，一个阿姐达玲，仪表局，老娘马文秀，大块头，走路慢悠悠，说话轻轻交，做啥讲得嘎祥细？因为达世钧后来到了日本，来回通了五、六封信之后就失联了，作兴有朋友格朋友晓得达世钧下落呢？搿只故事就可以讲完整啦。

～～刚刚结束呒么多少辰光，有据可查哦，某一天，达世钧神秘兮兮拉我到复兴公园里厢一只角落头，伊拿出来一大叠报纸，句触冒边搭我讲：伊拉屋里出大事体了，啊？一开口就拿我吓了一大跳，就个把礼拜呒么碰头，出啥事体？侬先看看报纸，一看是新加坡星洲日报，我先贼头狗脑看周围、再看起了报纸，搿格辰光看外国报纸会“刮三”、要捉到老派里厢去，报纸是套红中文繁体字，头版头条浪厢，一张照片，一眼介绍，呒啥啥么，钧钧讲侬照片看见啦？陶兴凯，伊是阿拉南京格同乡，屋里穷，小辰光勒了南京新街口搭人家修皮鞋、擦皮鞋，一直饿肚皮……，1937年到了上海，来寻着阿拉老头子，隑老头子格牌头，一路混到震旦，做仔同班同学，伊勒上海辰光格吃用开销、手头紧张要调头寸、侪靠阿拉老头子，达父是外国轮船公司格白领，赚得动！老早格人哦，真是讲义气！后来分开了，几十年呒么消息了，两个号头之前，勿晓得通过啥格路子，突然寻着阿拉爷了，写了封信来问问情况，老头就回了一封信，隔手收到陶先生寄来格二千美金、一只三洋牌两喇叭收录机！搿格辰光二千美金啊，嘎大一笔铜钿，一家门就笑勿动、睏勿着觉了，太意外啦！而且马上要到上海来搭老头子商量到南京去投资开饭店，而且所有格权力侪要交拨老头子，搿格辰光外头万元户还呒么啦，搿能一来儿子啊、亲戚朋友啊、好兄弟啊……，对伐？真是喜从天降，开心啊，唉！啥人晓得会乐极生悲呢，陶兴凯昨日一飞到上海，迫勿及待格从虹桥机场打得来一只电话，只讲了几句闲话、老头子突然中风了，现在老头子勒了广慈医院抢救，陶先生要来啦！哪能办？噢，快走啊！一个屁头、出公园、过一条思南路、就到瑞金路了，等阿拉两个人赶到医院辰光，陶先生已经先到了，达娘介绍了独养儿子达世钧，陶先生只是点了点头，讲了一句，搭医院讲好了，尽全力抢救吧，费用全部由伊来…，达父呒么摒牢，呒么醒过、呒么留一句话，就搿能走了……

老达走脱了，陶兴凯信勿过小达，老娘也勿会一再开口，后来达世钧就辞脱了向明中学工作，到日本去了……

天意吧，真格是应了一句老古闲话，福兮祸所伏，祸兮福所倚。

陶兴凯到中国来了后叫陶欣伯了，因为我看过一大叠新加坡报纸。陶先生随后勒了新街口造只37层格金陵饭店，是当时中国第一高楼、是改开后第一批涉外饭店、有中国第一只旋转餐厅、饭店顶层可以停直升飞机，金陵饭店成为了南京城天际线标志性建筑，陶先生后来又造了上海世贸商城、北京亮马河大厦、苏州工业园区、苏州锦华苑、南京状元楼……

旧社会，一个勒了新街口帮人家擦皮鞋格苦小囡，命运却拿陶兴凯推成了大老板，英雄勿问出生地！今朝我拿我所晓得格轶事分享拨大家、金陵饭店为啥要造了新街口、为啥就要造37层、金陵饭店为啥勿叫金陵大酒家。

江雨霏霏江草齐

六朝如梦鸟空啼

无情最是台城柳

依旧烟笼十里堤

我讲我格《南京》